對我來說，瑜珈是我第二人生。
四年前離開咗職場，家庭主婦成為咗我新嘅「職業」。習慣咗每日返工、放工營營役役嘅我竟然唔係好知道點樣去面對呢一份新嘅職業，突然之間搵唔到自己嘅價值同埋目標。每一日都係好努力咁「返工」同埋冇得放工，日復一日做同樣嘅事。
作為三子之母，每日有咁多時間陪住小朋友的確係好幸福嘅事，亦都開始越嚟越「幸福肥」，有迫切運動嘅需要。年半前，喺我呢個心靈同身體都咁有需要嘅時候，比我見到 IG 有雙人空中瑜珈 workshop，仲話新手都可以參加，即使身邊冇人得閒陪我去，我都一個人報咗名上呢個「雙人課」。其實去到都有少少緊張，似乎得我一個真係新手，亦都只有我冇partner。
嗰一堂嘅空中瑜珈係上呼拉圈嘅，同學仔好輕易做到嘅動作我完全跟唔到，連爬上去個圈都爬唔到。滿滿嘅挫敗感唔單止冇令我放棄，反而突然之間變咗我一個小小嘅目標，好想可以學識呢一樣嘢。然後就順理成章開始咗我嘅空中瑜珈生涯，從 hoop 到 hammock，每個星期上一堂到每個星期兩堂，我開始慢慢可以駕馭到初級嘅空中瑜珈。
Fake it until you make it, 我將課堂上面「專業」嘅相 post 喺IG，身邊嘅朋友都以為我好叻，呢種滿足感都好耐冇試過。其實我仲係 entry level，只係好多嘢唔係你想像中咁難，肯踏出第一步終有一日就可以做到。瑜珈對我嚟講係一個興趣，係一個挑戰，係一個放鬆嘅時候，亦都俾咗我自我肯定同埋不斷進步嘅目標。
每個媽媽要好好照顧家庭嘅同時，其實都要好好照顧自己，咁樣全家人先至可以一齊健康咁成長。因為空中瑜珈，退咗休嘅我都可以搵到第二生命。我唔單只係一個師奶，都係一個 aerial yoga lover 。
瑜珈故事徵稿活動為 Hello Yogis 為 2022 國際瑜珈日所推出的特別企劃，內容不只邀請多位瑜珈練習者分享自己的親身經驗、想給瑜珈練習者的一句話，還包含充分體現瑜珈哲學精神的「公益線上瑜珈課」，邀請大家一起感受瑜珈的美好，創造善循環推及更多人！
- 完整企劃這裡看>>2022年國際瑜珈日特別企劃｜和你分享 Yogis 的瑜珈故事，一起將瑜珈哲學付諸生活
- 更多瑜珈故事>>點我查看
若你喜歡我們的理念，或是想看見更多與瑜珈相關的內容，歡迎加入我們的社群，掌握最新的瑜珈生活資訊唷～
FB：http://helloyogis.media/3q67a9
IG：http://helloyogis.media/3l2mzk
